ఆంధ్రప్రదేశ్లో రైల్వే కనెక్టివిటీని మరింత విస్తరించేందుకు కేంద్ర రైల్వేశాఖ కీలక ప్రాజెక్టులపై దృష్టి సారించింది. రాష్ట్రంలోని వివిధ ప్రాంతాలను ప్రధాన నగరాలు, పారిశ్రామిక ప్రాంతాలు, పోర్టులతో అనుసంధానించేలా 9 కీలక కొత్త రైల్వే ప్రాజెక్టులను ప్రతిపాదించినట్లు తెలుస్తోంది. ముఖ్యంగా తెలంగాణ, కర్ణాటక, మహారాష్ట్ర, మధ్యప్రదేశ్ తదితర ప్రాంతాల నుంచి ఏపీలోని పోర్టులు, ఇతర కీలక ప్రాంతాలకు రైలు ప్రయాణాన్ని సులభతరం చేయడమే లక్ష్యంగా కొత్త మార్గాలపై దృష్టి పెట్టారు.
కొత్త రైల్వే లైన్లు అందుబాటులోకి వస్తే ప్రయాణ సమయం తగ్గడంతో పాటు సరకు రవాణా మరింత సులభమయ్యే అవకాశం ఉంది. ముఖ్యంగా పారిశ్రామిక ప్రాంతాలు, పోర్టులకు మెరుగైన రైలు కనెక్టివిటీ ఏర్పడటం ద్వారా లాజిస్టిక్స్ ఖర్చులు తగ్గే అవకాశం ఉందని భావిస్తున్నారు.
సికింద్రాబాద్–శ్రీశైలం–మార్కాపురం రైల్వే లైన్
ప్రతిపాదిత ప్రాజెక్టుల్లో సికింద్రాబాద్–శ్రీశైలం–మార్కాపురం కొత్త రైల్వే లైన్ కీలకంగా మారింది. సుమారు 290 కిలోమీటర్ల పొడవున ఈ రైల్వే మార్గాన్ని ప్రతిపాదించారు. తెలంగాణతో పాటు పశ్చిమ, మధ్య భారత ప్రాంతాల నుంచి శ్రీశైలానికి రైలు కనెక్టివిటీ ఏర్పడటంతో పాటు, రామాయపట్నం, కృష్ణపట్నం పోర్టులకు ప్రత్యామ్నాయ రైలు మార్గం అందుబాటులోకి వచ్చే అవకాశం ఉంది.
ఈ ప్రాజెక్టుకు సంబంధించి ఫైనల్ లొకేషన్ సర్వే (FLS) చేపట్టేందుకు ప్రతిపాదనలు చేసినట్లు సమాచారం. గతంలోనే ఈ రైల్వే లైన్ ప్రతిపాదనను ముఖ్యమంత్రి చంద్రబాబు కేంద్రం దృష్టికి తీసుకెళ్లారు.
గద్వాల్–మాచర్ల కొత్త రైల్వే లైన్
తెలంగాణలోని గద్వాల్ నుంచి ఏపీలోని పల్నాడు జిల్లా మాచర్ల వరకు 184.2 కిలోమీటర్ల మేర కొత్త రైల్వే లైన్ను ప్రతిపాదించారు. ఈ మార్గం పూర్తయితే తెలంగాణతో పాటు కర్ణాటకలోని పలు ప్రాంతాల నుంచి ఆంధ్రప్రదేశ్లోని పోర్టులకు రైలు కనెక్టివిటీ మరింత మెరుగుపడే అవకాశం ఉంది.
ఈ ప్రాజెక్టుకు సంబంధించిన డీపీఆర్ను రైల్వే బోర్డుకు పంపినట్లు సమాచారం.
దొనకొండ–ఒంగోలు రైల్వే లైన్
మార్కాపురం జిల్లా పరిధిలోని దొనకొండ నుంచి ఒంగోలు వరకు 119.6 కిలోమీటర్ల కొత్త రైల్వే లైన్ ప్రతిపాదించారు. దొనకొండ ఇండస్ట్రియల్ జోన్ను రామాయపట్నం పోర్టుతో అనుసంధానించడమే ఈ ప్రాజెక్టు ప్రధాన ఉద్దేశంగా ఉంది. ఇందుకు సంబంధించిన డీపీఆర్ తయారీ ప్రక్రియ కొనసాగుతోంది.
ఈ రైల్వే మార్గం అందుబాటులోకి వస్తే దొనకొండ ప్రాంతంలోని పారిశ్రామిక కార్యకలాపాలకు, రామాయపట్నం పోర్టు ఆధారిత సరకు రవాణాకు ప్రయోజనం చేకూరే అవకాశం ఉంది.
దూపాడు–బేతంచెర్ల లైన్ కూడా ప్రతిపాదన
ఉమ్మడి కర్నూలు జిల్లా పరిధిలో దూపాడు–బేతంచెర్ల మధ్య 53.9 కిలోమీటర్ల కొత్త రైల్వే లైన్ను కూడా ప్రతిపాదించారు. ప్రస్తుతం కర్నూలు నుంచి డోన్ మీదుగా వెళ్లే మార్గానికి ప్రత్యామ్నాయంగా బేతంచెర్లకు నేరుగా రైలు కనెక్టివిటీ కల్పించడమే ఈ ప్రతిపాదన ఉద్దేశం.
ఈ మార్గం ద్వారా ఓర్వకల్లు ఇండస్ట్రియల్ నోడ్కు రైలు అనుసంధానం మరింత మెరుగుపడే అవకాశం ఉంది. ఈ ప్రాజెక్టుకు సంబంధించిన డీపీఆర్ ఇప్పటికే రైల్వే బోర్డుకు చేరినట్లు సమాచారం.
మొత్తంగా ఈ ప్రతిపాదిత రైల్వే ప్రాజెక్టులు కార్యరూపం దాల్చితే ఏపీలోని పోర్టులు, పారిశ్రామిక ప్రాంతాలు, పర్యాటక కేంద్రాలకు ఇతర రాష్ట్రాల నుంచి రైలు కనెక్టివిటీ పెరగడంతో పాటు ప్రయాణికులు, వ్యాపారులు, సరకు రవాణా రంగానికి ప్రయోజనం కలిగే అవకాశం ఉంది.
