విజయవాడలో ఘనంగా నిర్వహించనున్న దసరా ఉత్సవాలకు తమిళనాడు ముఖ్యమంత్రి విజయ్‌ను ముఖ్య అతిథిగా ఆహ్వానించారు. దసరా వేడుకలకు హాజరై ఇంద్రకీలాద్రిపై జరిగే శరన్నవరాత్రి మహోత్సవాల వైభవాన్ని స్వయంగా వీక్షించాలని కోరుతూ నిర్వాహక బృందం సీఎం విజయ్‌కు ఆహ్వాన పత్రిక అందజేసింది.
సీఎం విజయ్‌ను ఆహ్వానించిన బృందంలో ఎంపీలు లావు శ్రీకృష్ణదేవరాయలు, మాగుంట శ్రీనివాసులు రెడ్డి, జీఎం హరీష్‌ బాలయోగి ఉన్నారు. ఈ సందర్భంగా దసరా ఉత్సవాల ప్రత్యేకత, నిర్వహణకు చేస్తున్న ఏర్పాట్ల గురించి ఆయనకు వివరించినట్లు సమాచారం.
ఇదిలా ఉండగా విజయవాడలోని ఇంద్రకీలాద్రిపై దసరా సందడి ఇప్పటికే ప్రారంభమైంది. ఈ ఏడాది శరన్నవరాత్రి మహోత్సవాలను అక్టోబర్‌ 11 నుంచి 20వ తేదీ వరకు వైభవంగా నిర్వహించేందుకు అధికారులు విస్తృత ఏర్పాట్లు చేస్తున్నారు.
పెద్ద సంఖ్యలో భక్తులు అమ్మవారిని దర్శించుకునే అవకాశం ఉన్న నేపథ్యంలో దర్శనాలు, క్యూలైన్లు, ట్రాఫిక్‌, భద్రత, తాగునీరు తదితర అంశాలపై ప్రత్యేక దృష్టి సారిస్తున్నారు. భక్తులకు ఎలాంటి అసౌకర్యం కలగకుండా అన్ని ఏర్పాట్లను సమన్వయంతో పూర్తి చేసేందుకు అధికారులు చర్యలు చేపడుతున్నారు.
