ఎన్నికల సమయంలో తన ప్రసంగాల తీరు భిన్నంగా ఉంటుందని, ప్రస్తుత పరిస్థితుల్లో మాత్రం రాష్ట్ర అభివృద్ధే తన ప్రధాన లక్ష్యమని ఏపీ డిప్యూటీ సీఎం పవన్‌ కళ్యాణ్‌ అన్నారు. హద్దులు దాటినప్పుడు, గొడవలు లేదా యుద్ధ పరిస్థితులు ఎదురైనప్పుడు మాత్రమే తన మాట, గొంతు తీవ్రంగా మారుతాయని పేర్కొన్నారు. ప్రస్తుతం ఇది శాంతి సమయమని, ప్రజలకు అభివృద్ధి అందించాల్సిన సమయమని స్పష్టం చేశారు.
ఏపీ ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్‌ కళ్యాణ్‌ కడప జిల్లా ప్రొద్దుటూరులో పర్యటించారు. ఈ సందర్భంగా రూ.30,156 కోట్ల విలువైన జల్‌ జీవన్‌ మిషన్‌–అమరజీవి జలధార ప్రాజెక్టులకు శంకుస్థాపన చేశారు. అనంతరం నిర్వహించిన సభలో పవన్‌ కళ్యాణ్‌ పలు కీలక వ్యాఖ్యలు చేశారు.
పులివెందుల అయినా, వైసీపీ ఎంపీ ప్రాతినిధ్యం వహిస్తున్న అరకు అయినా.. కూటమి ప్రభుత్వం కక్ష సాధింపుల ప్రభుత్వంగా వ్యవహరించదని పవన్‌ కళ్యాణ్‌ స్పష్టం చేశారు. రాయలసీమ పౌరుషానికి తగ్గట్టుగా ప్రస్తుతం తాను ప్రసంగించడం లేదని, రాయలసీమ అభివృద్ధికి అనుగుణంగా మాట్లాడుతున్నానని చెప్పారు. భవిష్యత్తులో రాజకీయ పరిస్థితులు మారితే తన ప్రసంగం ఎలా ఉంటుందో అందరికీ తెలుసన్నారు.
గొడవలు, కొట్లాటలు, గొడ్డలిపోట్లు కాకుండా అభివృద్ధి లక్ష్యంగా ముందుకు సాగాలని ప్రజలకు పిలుపునిచ్చారు. యువతకు మెరుగైన భవిష్యత్తు, ఉద్యోగ అవకాశాలు కల్పించడమే ప్రభుత్వ లక్ష్యమన్నారు. ప్రజల ఆశీస్సులు, కూటమిపై ఉంచిన నమ్మకం కారణంగానే రాష్ట్రంలో ఇలాంటి భారీ అభివృద్ధి కార్యక్రమాలను చేపట్టగలుగుతున్నామని పేర్కొన్నారు.
కూటమి ప్రభుత్వానికి ప్రజలు ఓటు వేసి అండగా నిలిచినందుకు కృతజ్ఞతగా రూ.30 వేల కోట్లకు పైగా విలువైన అమరజీవి జలధార–జల్‌ జీవన్‌ మిషన్‌ పనులకు శ్రీకారం చుట్టామని పవన్‌ కళ్యాణ్‌ తెలిపారు. రాష్ట్రంలో ప్రతి ఒక్కరూ తాగునీరు తాగే సమయంలో అమరజీవి పొట్టి శ్రీరాములు చేసిన త్యాగాన్ని స్మరించుకోవాలనే ఉద్దేశంతో ఈ ప్రాజెక్టుకు ఆ పేరు పెట్టినట్లు చెప్పారు.
రాష్ట్రంలో తాగునీటి సమస్యకు శాశ్వత పరిష్కారం చూపే లక్ష్యంతో రూ.30,106 కోట్ల నిధులతో 50,315 పనులు చేపడుతున్నట్లు పవన్‌ కళ్యాణ్‌ వివరించారు. వీటి ద్వారా 24,601 ఆవాసాల్లో 61.60 లక్షల కుళాయి కనెక్షన్ల సామర్థ్యాన్ని పెంచడంతో పాటు, మరో 27.36 లక్షల కొత్త కుళాయి కనెక్షన్లను ప్రతి ఇంటికీ అందించేందుకు కార్యాచరణ రూపొందించినట్లు తెలిపారు. ఈ కార్యక్రమం పూర్తయితే రాష్ట్రవ్యాప్తంగా 3.27 కోట్ల మంది ప్రజలకు సురక్షితమైన తాగునీరు అందించాలన్న లక్ష్యాన్ని ప్రభుత్వం సాధించనుందని పవన్‌ కళ్యాణ్‌ పేర్కొన్నారు.
