ఆంధ్రప్రదేశ్ రాజకీయాల్లో పార్టీ మార్పులు కొనసాగుతున్నాయి. తాజాగా వైఎస్సార్‌సీపీకి చెందిన పలువురు నేతలు జనసేన పార్టీలో చేరారు. తుని నియోజకవర్గానికి చెందిన సీనియర్ నేత యనమల కృష్ణుడు, హిందూపురం నియోజకవర్గానికి చెందిన నవీన్ నిశ్చల్, ఏలూరు డీసీసీబీ మాజీ ఛైర్మన్ పీవీఎల్ఎన్ నరసింహరాజు తదితరులు జనసేన అధినేత, ఏపీ ఉప ముఖ్యమంత్రి పవన్ కల్యాణ్ సమక్షంలో పార్టీ కండువా కప్పుకున్నారు.
వీరితో పాటు వైఎస్సార్‌సీపీ కందుకూరు, సర్వేపల్లి, కనిగిరి నియోజకవర్గాల పరిశీలకుడు మన్నెమాల సుకుమార్ రెడ్డి, కాంగ్రెస్ నాయకురాలు అయితాబత్తుల సుభాషిణి, తునికి చెందిన పొలినాటి శేషగిరిరావు, తణుకు నేత దిరిశాల కృష్ణ శ్రీనివాస్, శ్రీకాళహస్తికి చెందిన సత్రవాడ ప్రవీణ్, మిద్దెల హరి, ముమ్మడివరం మాజీ ఏఎంసీ ఛైర్మన్ కుడిపూడి శివన్నారాయణ, నరసరావుపేటకు చెందిన ఏలూరి ప్రసాద్ తదితరులు కూడా జనసేనలో చేరినట్లు పార్టీ వర్గాలు వెల్లడించాయి.
యనమల కృష్ణుడు తుని రాజకీయాల్లో సీనియర్ నేతగా ఉన్నారు. ఆయన మాజీ మంత్రి యనమల రామకృష్ణుడి సోదరుడు. మరోవైపు నవీన్ నిశ్చల్ గతంలో హిందూపురం నుంచి స్వతంత్ర అభ్యర్థిగా, వైఎస్సార్‌సీపీ అభ్యర్థిగా పోటీ చేశారు. వైఎస్సార్‌సీపీ ప్రభుత్వ హయాంలో ఏపీ ఆగ్రోస్ చైర్మన్‌గా కూడా పనిచేశారు. ఆయనను వైఎస్సార్‌సీపీ గతంలో సస్పెండ్ చేసింది.
పీవీఎల్ఎన్ నరసింహరాజు ఏలూరు డీసీసీబీ మాజీ ఛైర్మన్, ఉండి నియోజకవర్గ మాజీ ఇన్‌ఛార్జ్‌గా పనిచేశారు. తాజాగా ఆయన కూడా వైఎస్సార్‌సీపీని వీడి జనసేనలో చేరారు. స్థానిక సంస్థల ఎన్నికల నేపథ్యంలో వివిధ పార్టీల్లో చోటుచేసుకుంటున్న ఈ చేరికలు ఆయా నియోజకవర్గాల్లో రాజకీయ సమీకరణాలపై చర్చకు దారితీస్తున్నాయి.
