తిరుపతి నగర రూపురేఖలను మార్చే దిశగా ఆంధ్రప్రదేశ్ ప్రభుత్వం కీలక అడుగులు వేస్తోంది. తిరుమల శ్రీవారి దర్శనానికి వచ్చే భక్తులకు రద్దీ సమస్యలను తగ్గించి, మరింత సౌకర్యవంతమైన ఆధ్యాత్మిక అనుభూతిని అందించడమే లక్ష్యంగా భారీ అభివృద్ధి కార్యక్రమాలకు శ్రీకారం చుట్టింది. ఇందులో భాగంగా తిరుపతి అర్బన్ డెవలప్‌మెంట్ అథారిటీ (తుడా) పరిధిలో రూ.3,222 కోట్ల విలువైన అభివృద్ధి పనులకు ముఖ్యమంత్రి నారా చంద్రబాబు నాయుడు అమరావతి సచివాలయం నుంచి వర్చువల్‌గా శంకుస్థాపన చేశారు. ఇదే కార్యక్రమంలో భక్తులకు ఉపయోగపడేలా రూపొందించిన నూతన ‘వెంకటాద్రి’ యాప్‌ను కూడా ముఖ్యమంత్రి ఆవిష్కరించారు.
రూ.2,750 కోట్లతో ఇంటిగ్రేటెడ్ పిలిగ్రిమ్ టౌన్‌షిప్
ఈ అభివృద్ధి ప్రణాళికలో అత్యంత కీలకమైనది రూ.2,750 కోట్ల అంచనా వ్యయంతో నిర్మించనున్న ఇంటిగ్రేటెడ్ పిలిగ్రిమ్ టౌన్‌షిప్. తిరుపతికి వచ్చే భక్తులకు కొండపైకి వెళ్లకముందే ఆధ్యాత్మిక వాతావరణాన్ని అందించడంతో పాటు, వారికి అవసరమైన సౌకర్యాలను ఒకే ప్రాంతంలో కల్పించాలన్న లక్ష్యంతో ఈ ప్రాజెక్టును చేపడుతున్నారు. ఈ నిర్మాణాన్ని రెండేళ్లలో పూర్తి చేయాలని ముఖ్యమంత్రి చంద్రబాబు అధికారులకు గడువు నిర్దేశించినట్లు సమాచారం. నిర్ణీత సమయంలో పనులు పూర్తయ్యేలా ప్రణాళికాబద్ధంగా ముందుకు సాగాలని సూచించారు.
భక్తులకు మెరుగైన సౌకర్యాలే లక్ష్యం
తిరుమలలో భక్తుల రద్దీని సమర్థంగా నిర్వహించడం, తిరుపతిలో యాత్రికులకు మెరుగైన సదుపాయాలు కల్పించడం ఈ ప్రాజెక్టు ప్రధాన లక్ష్యాలుగా ఉన్నాయి. నిర్మాణ పనుల్లో నాణ్యతకు ప్రాధాన్యమివ్వాలని, కేవలం వాణిజ్య ప్రయోజనాలకే పరిమితం కాకుండా శ్రీవారి సేవాభావంతో బాధ్యతాయుతంగా పనిచేసే సంస్థలకు ప్రాజెక్టు బాధ్యతలు అప్పగించాలని ముఖ్యమంత్రి అధికారులకు సూచించినట్లు తెలుస్తోంది.
తిరుపతికి వచ్చే ప్రతి భక్తుడికి కొండ దిగువనే ప్రశాంతమైన, పవిత్రమైన ఆధ్యాత్మిక వాతావరణం కల్పించేలా ఈ టౌన్‌షిప్‌ను అభివృద్ధి చేయాలన్నది ప్రభుత్వ ఆలోచన. ప్రతిపాదిత పనులు నిర్ణీత గడువులో పూర్తయి, ప్రణాళిక ప్రకారం అమలైతే తిరుపతి యాత్రికుల మౌలిక సదుపాయాల్లో గణనీయమైన మార్పులు చోటుచేసుకునే అవకాశం ఉంది.
