ఆంధ్రప్రదేశ్, తమిళనాడు రాష్ట్రాల మధ్య జలవనరుల పంపిణీకి సంబంధించి కీలక పరిణామం చోటుచేసుకుంది. రెండు రాష్ట్రాల ముఖ్యమంత్రులు చంద్రబాబు నాయుడు, విజయ్ అమరావతిలోని ముఖ్యమంత్రి క్యాంపు కార్యాలయంలో సమావేశమయ్యారు. తమిళనాడు ముఖ్యమంత్రిగా బాధ్యతలు చేపట్టిన అనంతరం విజయ్ ఆంధ్రప్రదేశ్‌లో అధికారికంగా పర్యటించడం ఇదే తొలిసారి కావడంతో ఈ భేటీకి రాజకీయంగా, పరిపాలనాపరంగా ప్రాధాన్యం ఏర్పడింది.
ఈ సమావేశంలో ప్రధానంగా చెన్నై నగర తాగునీటి అవసరాలను తీర్చే తెలుగు గంగ ప్రాజెక్టు ద్వారా కృష్ణా జలాల సరఫరా, అలాగే ప్రతిపాదిత గోదావరి–కృష్ణా–కావేరి నదుల అనుసంధానం వంటి అంశాలు చర్చకు రానున్నట్లు సమాచారం. ఈ ఏడాది తమిళనాడుకు కేటాయించిన కృష్ణా జలాల్లో ఆశించిన స్థాయిలో నీరు అందకపోవడంతో, భవిష్యత్తులో నీటి విడుదలను సజావుగా కొనసాగించే అంశంపై ఇరు రాష్ట్రాల మధ్య చర్చ జరిగినట్టు తెలిసింది.
ఈ భేటీలో ఆంధ్రప్రదేశ్ తరఫున మంత్రులు పొంగూరు నారాయణ, నిమ్మల రామానాయుడు, ఎంపీ మాగుంట శ్రీనివాసులు రెడ్డి పాల్గొన్నారు. ఈ సందర్భంగా వారిని ముఖ్యమంత్రి చంద్రబాబు నాయుడు తమిళనాడు సీఎం విజయ్‌కు పరిచయం చేశారు. రెండు రాష్ట్రాల మధ్య నీటి పంపిణీ సమస్యలకు పరిష్కార మార్గాలను అన్వేషించడంతో పాటు, అంతర్రాష్ట్ర సహకారాన్ని మరింత బలోపేతం చేసుకునే దిశగా ఈ సమావేశం ప్రాధాన్యం సంతరించుకుంది.
అంతకుముందు గన్నవరం విమానాశ్రయానికి చేరుకున్న తమిళనాడు ముఖ్యమంత్రి విజయ్, విజయవాడలోని ఇంద్రకీలాద్రిపై కొలువైన శ్రీ కనకదుర్గమ్మ అమ్మవారిని దర్శించుకున్నారు. ఆలయ అధికారులు ఆయనకు పూర్ణకుంభంతో స్వాగతం పలికారు. అనంతరం విజయవాడలో నిర్వహించనున్న విజయవాడ ఉత్సవ్ 2.0 వేడుకల్లో పాల్గొని, కార్యక్రమాలు ముగిసిన తర్వాత చెన్నైకి వెళ్లారు.
