అరకు పార్లమెంట్ అభ్యర్థిని గెలిపించినా వచ్చా.. ఎందుకంటే..

గిరిజన గ్రామాలకు రహదారి సౌకర్యం కల్పించి, మారుమూల ప్రాంతాల ప్రజల జీవన ప్రమాణాలను మెరుగుపరచడమే తన లక్ష్యమని ఆంధ్రప్రదేశ్ ఉప ముఖ్యమంత్రి పవన్ కల్యాణ్ స్పష్టం చేశారు. అల్లూరి సీతారామరాజు తనకు స్ఫూర్తి అని, గిరిజన ప్రాంతాలంటే తనకు ప్రత్యేకమైన అభిమానమని పేర్కొన్నారు. రాష్ట్రంలోని ఏ గిరిజన గ్రామం కూడా రహదారి సౌకర్యం లేకుండా ఉండకూడదన్నదే తన ఆకాంక్ష అని తెలిపారు.

పోలవరం జిల్లాలోని గిరిజన గ్రామాల్లో పర్యటించిన పవన్ కల్యాణ్, రాకోట గ్రామంలో ఆదివాసీలతో ముఖాముఖి నిర్వహించి వారి సమస్యలను అడిగి తెలుసుకున్నారు. స్థానికులు ఎదుర్కొంటున్న ఇబ్బందులు, మౌలిక సదుపాయాల కొరత, అభివృద్ధికి సంబంధించిన అంశాలపై వారితో చర్చించారు. తమ గ్రామాన్ని రెవెన్యూ గ్రామంగా గుర్తించాలని స్థానికులు కోరగా, సమస్యను పరిష్కరించేందుకు చర్యలు తీసుకుంటామని హామీ ఇచ్చారు.

అలాగే గిరిజనులు సేకరించి, తయారు చేస్తున్న అటవీ ఉత్పత్తుల గురించి వివరాలు తెలుసుకున్నారు. వాటికి మెరుగైన మార్కెటింగ్ సదుపాయాలు కల్పించడం ద్వారా ఆదివాసీ కుటుంబాలకు ఆదాయ అవకాశాలు పెంచే అంశాలపై ఆరా తీశారు. గిరిజనుల జీవనోపాధిని బలోపేతం చేయడంతో పాటు వారి సంప్రదాయ వృత్తులకు ప్రోత్సాహం అందించాల్సిన అవసరాన్ని ఈ సందర్భంగా ప్రస్తావించారు.

రూ.2,052 కోట్లతో రహదారుల నిర్మాణం

గిరిజన ప్రాంతాల్లో రవాణా సౌకర్యాలను మెరుగుపరిచే లక్ష్యంతో కాకవాడలో పవన్ కల్యాణ్ ‘అడవి తల్లి 2.0’ కార్యక్రమాన్ని ప్రారంభించారు. ఈ కార్యక్రమంలో భాగంగా రూ.2,052 కోట్ల వ్యయంతో గిరిజన ప్రాంతాల్లో రహదారుల నిర్మాణానికి శ్రీకారం చుట్టారు. ఈ ప్రాజెక్టు ద్వారా 1,341 గిరిజన ఆవాసాలకు 1,946 కిలోమీటర్ల మేర రహదారి సౌకర్యం కల్పించనున్నారు. ఈ నిర్మాణాలు పూర్తయితే మారుమూల గిరిజన గ్రామాలకు రవాణా సౌకర్యాలు మెరుగుపడటంతో పాటు విద్య, వైద్యం, అత్యవసర సేవలు ప్రజలకు మరింత చేరువయ్యే అవకాశం ఉంది.

‘గిరిజనులు నా వాళ్లు.. వారి సమస్య నా సమస్య’

అనంతరం జరిగిన సభలో పవన్ కల్యాణ్ మాట్లాడుతూ, నగరాలతో పోలిస్తే గిరిజన ప్రాంతాల్లో రహదారుల నిర్మాణానికి అధిక వ్యయం అవుతుందని పేర్కొన్నారు. అయినప్పటికీ గిరిజన ప్రజలను తనవారిగా భావించి, వారి సమస్యలను తన సమస్యలుగా స్వీకరించానని తెలిపారు. తాను కూడా గిరిజన ప్రజల్లో ఒకడినేనని భావిస్తానని, వారి అభివృద్ధికి కట్టుబడి ఉన్నానని స్పష్టం చేశారు.

ఆదివాసీలు ప్రకృతిని, పర్యావరణాన్ని, తమ సంస్కృతి సంప్రదాయాలను కాపాడటంలో కీలక పాత్ర పోషిస్తున్నారని కొనియాడారు. అలాంటి ప్రజలకు కనీస మౌలిక సదుపాయాలు అందించాల్సిన బాధ్యత ప్రభుత్వంపై ఉందన్నారు. ఇప్పటికీ కొన్ని ఏజెన్సీ ప్రాంతాల్లో రహదారులు, విద్యుత్ సౌకర్యాలు అందుబాటులో లేకపోవడం బాధాకరమని పేర్కొన్నారు.

ముఖ్యంగా, ప్రసవం కోసం గిరిజన మహిళలను డోలీల్లో ఆసుపత్రులకు తరలించాల్సిన పరిస్థితులు కొనసాగుతుండటంపై ఆవేదన వ్యక్తం చేశారు. రహదారుల నిర్మాణం ద్వారా ఇటువంటి ఇబ్బందులకు పరిష్కారం చూపడంతో పాటు గిరిజన కుటుంబాలకు మెరుగైన వైద్య సేవలు అందుబాటులోకి తీసుకురావాలని ఆకాంక్షించారు.

గిరిజన ప్రాంతాల సమగ్ర అభివృద్ధికి రహదారులు, విద్యుత్, వైద్యం, విద్య వంటి మౌలిక సదుపాయాల కల్పన అత్యంత కీలకమని ఈ పర్యటన ద్వారా పవన్ కల్యాణ్ మరోసారి స్పష్టం చేశారు.