తెలుగు సాహితీ ప్రపంచంలో చారిత్రక నవలలకు విశేష గుర్తింపు తీసుకొచ్చిన ప్రముఖ సాహితీవేత్త ముదిగొండ శివప్రసాద్ (86) కన్నుమూశారు. గత ఆరు నెలలుగా అనారోగ్యంతో బాధపడుతున్న ఆయన గురువారం రాత్రి 8.30 గంటలకు హైదరాబాద్‌లోని ఆంధ్ర మహిళా సభ దుర్గాబాయి దేశ్‌ముఖ్ ఆస్పత్రిలో తుదిశ్వాస విడిచారు. ఆయన మరణంతో తెలుగు సాహితీ రంగంలో విషాదం నెలకొంది.
ప్రకాశం జిల్లా నుంచి సాహితీ శిఖరాలకు..
1940లో ఆంధ్రప్రదేశ్‌లోని ప్రకాశం జిల్లా కొత్తపట్నం మండలం ఆకుల అల్లూరు గ్రామంలో జన్మించిన ముదిగొండ శివప్రసాద్, తన రచనలతో తెలుగు సాహిత్యంలో ప్రత్యేక స్థానాన్ని సంపాదించుకున్నారు. బాల్యంలో ఎంవీఎస్ శర్మ, రామనాథశాస్త్రి, మార్కండేయ శర్మ వంటి ప్రముఖుల వద్ద విద్యాభ్యాసం చేశారు. అనంతరం ఉపాధ్యాయుడిగా తన వృత్తి జీవితాన్ని ప్రారంభించి, 1959లో సికింద్రాబాద్‌లోని వెస్లీ హైస్కూల్‌లో పనిచేశారు. ఆ తర్వాత ఉస్మానియా విశ్వవిద్యాలయంలో తెలుగు ప్రొఫెసర్‌గా సేవలందించారు.
చారిత్రక నవలలతో చెరగని ముద్ర
ముదిగొండ శివప్రసాద్ తన సాహితీ ప్రయాణంలో 80కి పైగా పుస్తకాలను రచించారు. వీటిలో 20కి పైగా చారిత్రక నవలలు ఉండటం విశేషం. చరిత్రను సాహిత్యంతో మేళవిస్తూ, గత కాలపు సామాజిక పరిస్థితులు, సంస్కృతి, రాజవంశాల విశేషాలను పాఠకులకు పరిచయం చేయడంలో ఆయన ప్రత్యేక శైలిని ప్రదర్శించారు.
ఆయన రచనల్లో పట్టాభి, ఆవాహన, శ్రీపదార్చన, రెసిడెన్సీ, శ్రావణి, శ్రీలేఖ, వంశధార, విజయం, తంజావూరు, బసవగీత, సగం విరిగిన చంద్రుడు, గంగ నుంచి గంగ వరకు, పుష్యమిత్ర, బైబిల్ డీకోడ్ వంటి పుస్తకాలు ప్రముఖంగా నిలిచాయి. ఈ రచనలు ఆయనకు సాహితీ ప్రపంచంలో విశిష్ట గుర్తింపును తీసుకొచ్చాయి.
సాహితీ ప్రముఖుల సంతాపం
ముదిగొండ శివప్రసాద్ మృతి పట్ల ప్రభుత్వ మాజీ సలహాదారు డాక్టర్ కె.వి. రమణాచారి, తెలంగాణ సాహిత్య అకాడమీ మాజీ ఛైర్మన్ గౌరీశంకర్ తదితరులు సంతాపం వ్యక్తం చేశారు. తెలుగు సాహిత్యానికి ఆయన అందించిన సేవలను స్మరించుకున్నారు. చారిత్రక నవలా ప్రక్రియకు ఆయన చేసిన కృషి చిరస్మరణీయమని పేర్కొన్నారు.
