ప్రముఖ సంగీత దర్శకుడు అనిరుధ్‌ రవిచందర్‌, సన్‌రైజర్స్‌ హైదరాబాద్‌ ఫ్రాంచైజీ సీఈవో కావ్యా మారన్‌ వివాహంపై వస్తున్న వార్తలు మరోసారి ఆసక్తిని రేకెత్తిస్తున్నాయి. సన్‌ గ్రూప్‌ ఛైర్మన్‌ కళానిధి మారన్‌, ఆయన సతీమణి హైదరాబాద్‌లో తెలంగాణ ముఖ్యమంత్రి రేవంత్‌ రెడ్డిని కలవడం ఇప్పుడు చర్చనీయాంశంగా మారింది. తమ కుమార్తె కావ్యా మారన్‌ వివాహ రిసెప్షన్‌కు ఆహ్వానించేందుకే వారు సీఎంను కలిసినట్లు సమాచారం.
హైదరాబాద్‌లోని జూబ్లీహిల్స్‌లో ఉన్న సీఎం రేవంత్‌ రెడ్డి నివాసంలో కళానిధి మారన్‌ దంపతులు ఆయనను, ఆయన సతీమణిని కలిసినట్లు తెలుస్తోంది. ఈ సందర్భంగా అనిరుధ్‌ రవిచందర్‌, కావ్యా మారన్‌ వివాహానికి సంబంధించిన ఆహ్వానాన్ని అందించినట్లు సంబంధిత వర్గాల సమాచారం. నవంబర్‌ 21న చెన్నైలో వివాహ రిసెప్షన్‌ జరగనున్నట్లు ఆహ్వాన వివరాల ద్వారా ప్రచారం జరుగుతోంది.
వివాహ తేదీలపై అధికారిక స్పష్టత ఏది?
అనిరుధ్‌ రవిచందర్‌, కావ్యా మారన్‌ వివాహంపై ఆసక్తికరమైన వార్తలు ప్రచారంలో ఉన్నప్పటికీ, ఇరు కుటుంబాలు ఇప్పటివరకు పెళ్లి విషయాన్ని అధికారికంగా ప్రకటించలేదు. వీరి వివాహం నవంబర్‌ 11న గ్రీస్‌లో జరగనుందని, నవంబర్‌ 14న చెన్నైలో మరో వేడుక నిర్వహించనున్నారని కొన్ని కథనాలు పేర్కొంటున్నాయి. అయితే ఈ తేదీలు, వేదికలు, కార్యక్రమాల వివరాలపై అధికారిక ధ్రువీకరణ లేదు. దీంతో ఈ ప్రముఖుల వివాహం ఎప్పుడు, ఎక్కడ జరగనుందన్న అంశంపై అభిమానుల్లో ఆసక్తి కొనసాగుతోంది. ముఖ్యంగా సినీ పరిశ్రమ, క్రికెట్‌ అభిమానులు ఈ వార్తలను ఆసక్తిగా గమనిస్తున్నారు.
