ది ప్యారడైజ్ రివ్యూ(The Paradise Movie Review)
నాని, దర్శకుడు శ్రీకాంత్ ఓదెల కాంబినేషన్‌లో వచ్చిన ది ప్యారడైజ్పై విడుదలకు ముందే భారీ అంచనాలు ఏర్పడ్డాయి. ‘దసరా’ తర్వాత వీరిద్దరి కలయిక కావడం, సినిమాకు సంబంధించిన టీజర్, పాటలు ప్రేక్షకుల్లో ఆసక్తిని పెంచడం, మాస్ యాక్షన్ ఎలిమెంట్స్ ఎక్కువగా ఉండటంతో ఈ చిత్రంపై హైప్ నెలకొంది. ఈరోజే ప్రేక్షకుల ముందుకు వచ్చిన ఈ చిత్రం ఎలా ఉందో చూద్దాం పదండి.
కథేంటి?
‘ది ప్యారడైజ్’ నేపథ్యంలో సవారీలు అనే వర్గం తమ ప్రాంతానికి, తమ సమాజానికి గుర్తింపు కోసం చేసే పోరాటాన్ని కథగా తీసుకున్నారు. ప్యారడైజ్ ప్రాంతంలో ఆధిపత్యం చెలాయించే దొరల కుటుంబాలు అక్కడి ప్రజలకు కనీస సౌకర్యాలు కూడా అందకుండా అడ్డుకుంటుంటాయి.
మోహన్ బాబు, రాఘవ్ జుయల్ దొరల కుటుంబానికి చెందిన కీలక పాత్రల్లో కనిపిస్తారు. మరోవైపు సవారీల తరఫున పోరాడే బాధ్యతను జడల్ తల్లి కోరుకుంటుంది. మొదట్లో తన వ్యక్తిగత కారణాలతో ఈ పోరాటానికి దూరంగా ఉండే జడల్.. పరిస్థితులు మారడంతో తన ప్రజల కోసం ముందుకు వస్తాడు. చివరకు ప్యారడైజ్ ప్రాంతానికి గుర్తింపు దక్కుతుందా? వారి పోరాటం ఎలాంటి మలుపులు తిరుగుతుంది? అనేదే సినిమా కథ.
కథనం ఎలా ఉంది?
సినిమాకు ఉన్న ప్రధాన సమస్య కథలో కొత్తదనం లేకపోవడం. ఇలాంటి నేపథ్యంతో కథను తెరకెక్కించినప్పటికీ, ప్రేక్షకుడిని నిరంతరం ఆసక్తిగా కూర్చోబెట్టే సన్నివేశాలు పెద్దగా కనిపించవు.
దాదాపు మూడు గంటల నిడివి ఉండటంతో కొన్ని సన్నివేశాలు సాగదీసిన భావన కలిగిస్తాయి. ముఖ్యంగా సినిమా ఎప్పుడు పూర్తవుతుందా అనే ఫీలింగ్ కొన్ని సందర్భాల్లో ప్రేక్షకులకు కలిగే అవకాశం ఉంది.
సినిమా మొత్తంలో ఒక బలమైన ‘వావ్’ మూమెంట్ కోసం ఎదురుచూసినా అది ఆశించిన స్థాయిలో వర్కవుట్ కాలేదు. తల్లి–కొడుకు మధ్య ఉండే ఎమోషనల్ ట్రాక్‌ను బలంగా చూపించే ప్రయత్నం చేసినప్పటికీ, అది పూర్తిస్థాయిలో కనెక్ట్ కాలేదు.
నాని ఎలా చేశాడు?
నాని తనకు అలవాటైన సహజమైన పాత్రలకు భిన్నంగా మాస్ షేడ్స్ ఉన్న జడల్ పాత్రలో కనిపించాడు. యాక్షన్ సన్నివేశాల్లో తనదైన శైలిలో నటించే ప్రయత్నం చేశాడు. అయితే పాత్రను మరింత బలంగా ఎలివేట్ చేసే సన్నివేశాలు లేకపోవడంతో నటుడిగా నాని నుంచి ఆశించిన స్థాయిలో ప్రభావం కనిపించలేదనే అభిప్రాయం కలుగుతుంది.
కయాదు లోహర్‌తో నాని లవ్ ట్రాక్ కూడా పెద్దగా ఆకట్టుకునేలా లేదు.
మిగతా నటీనటులు
మోహన్ బాబు, రాఘవ్ జుయల్ తమ పాత్రలకు తగ్గట్టుగా కనిపించారు. ప్రియదర్శి క్లైమాక్స్‌లో వచ్చే పాత్రలో ప్రత్యేకంగా కనిపిస్తాడు. సంపూర్ణేష్ బాబుకు మంచి స్క్రీన్ స్పేస్ ఉన్నప్పటికీ, అతని పాత్ర కథపై పెద్దగా ప్రభావం చూపలేకపోయింది.
యాక్షన్ ఎలా ఉంది?
ఈ సినిమాలో హింసాత్మక సన్నివేశాలు ఎక్కువగా ఉన్నాయి. మాస్ ప్రేక్షకులను దృష్టిలో పెట్టుకుని యాక్షన్‌ను భారీ స్థాయిలో చూపించే ప్రయత్నం చేశారు. అయితే కథకు, పాత్రలకు తగ్గట్టుగా ఆ హింసాత్మక సన్నివేశాలు పూర్తిస్థాయిలో ఎమోషనల్ ఇంపాక్ట్‌ను తీసుకురాలేకపోయాయి.
చివరగా..
ది ప్యారడైజ్పై ఉన్న భారీ హైప్‌కు తగ్గ కంటెంట్ కనిపించకపోవడం ప్రధాన లోపంగా అనిపిస్తుంది. నాని–శ్రీకాంత్ ఓదెల కాంబినేషన్‌పై ఉన్న అంచనాలు, మాస్ ట్రీట్‌మెంట్, యాక్షన్ అంశాలు సినిమాకు హైప్ తీసుకొచ్చినా.. కథనం, ఎమోషన్, లవ్ ట్రాక్ విషయంలో సినిమా వెనుకబడింది. ముఖ్యంగా ఎక్కువ నిడివి కూడా సినిమాకు మైనస్.
రేటింగ్: 2/5
ఫైనల్ వర్డిక్ట్: భారీ అంచనాలతో వచ్చిన ‘ది ప్యారడైజ్’.. ఆ అంచనాల స్థాయిలో ప్రేక్షకులను మెప్పించలేకపోయింది.
